Festival FKM

O FKM Festival Internacional de Cinema Fantástico da Coruña naceu no ano 2010 debido á necesidade de crear un evento adicado aos xéneros cinematográficos de fantástico, terror e ciencia ficción, non só na cidade da Coruña, senón tamén en Galicia. O Festival FKM está a encher un oco dentro do audiovisual que é demandado pola cidadanía, constituíndose coma o 1º Festival de xénero de Galicia, ofrecendo unha coidada selección de longametraxes e curtametraxes de amplo percorrido polos mellores festivais tanto nacionais como internacionais.

Este ano FKM adica a súa X Edición á temática SEXO, PROVOCACIÓN e CENSURA.

O cinema de xénero ten a cualidade de poñer de manifesto as nosas paixóns e medos ou a de satisfacer as nosas represións e desexos máis ocultos. Por iso, tamén é capaz de turbar ou crispar ao espectador máis avezado. Isto fai del un dos terreos máis fértiles para a semente da subversión e a práctica da transgresión.
Nesta edición mostraremos e contextualizaremos a obra de autores cuxa fantasía resultou especialmente transgresora ou subversiva, ata o punto de pagar a súa ousadía coa censura o ostracismo ou o exilio.